ცხელი ხაზი:(0431) 24-26-51 ან 595250309

ქუთაისის მერია მრავალშვილიანი ოჯახების ბიზნეს გაძლიერების პროგრამას აგრძელებს

7 მაისი, 2020

ქუთაისის მერიაში იმ კომისიის სხდომა გაიმართა, რომელსაც მერიის ერთ-ერთი უმნიშვნელოვანესი პროგრამის “მრავალშვილიანი ოჯახების ეკონომიკური გაძლიერებისა და მხარდაჭერის” პარტნიორი ორგანიზაცია უნდა გამოევლინა. კომისიის შემადგენლობაში არიან ადგილობრივი ხელისუფლების და არასამთავრობო ორგანიზაციების წარმომადგენლები.

კომისიის გადაწყვეტილებით , წელსაც ამ პროგრამის მხარდამჭერი ორგანიზაცია „მეწარმე ქალთა ფონდი“ იქნება . აღნიშნულ ორგანიზაციას უკვე აქვს მერიასთან თანამშრომლობის წარმატებული გამოცდილება სწორედ „მრავალშვილიანი ოჯახების მიერ მიკრო და მცირე მეწარმეობის დაწყების ან წარმოების გაფართოება- გადაიარაღების ხელშეწყობის პროექტის“ კუთხით. „მეწარმე ქალთა ფონდი“ მონაწილეობას მიიღებს მრავალშვილიანი ოჯახების განაცხადების შერჩევაში, შემდეგ ეტაპზე კი მათ დაეხმარება ბიზნესის წამოწყებაში ან გაფართოებაში. ეს რეალურად საპილოტე პროგრამაა, რომელიც გასულ წელს დანერგა ქუთაისმა. ეს არის მრავალშვილიანი ოჯახების მიკრო და მცირე ბიზნესის ხელშემწყობი თანადაფინანსების პროექტი.

„ ორგანიზაცია, რომელიც წელს შევარჩიეთ ჩვენს პარტნიორად , აკმაყოფილებს მთავარ კრიტერიუმებს - მას აქვს გამოცდილება, მდგრადობა, პროექტების მართვის კუთხით სანდოობა . განსაკუთრებულად საინტერესო იყო მათ განაცხადში ის დეტალი, რომ ამავე პროექტში შარშან მონაწილე ტრუშელევების ოჯახი, წელს თავად დაეხმარება სხვა მრავალშვილიან ოჯახებს და მათ შვილებს მეთოჯინეობას შეასწავლის. ამ პროგრამის მუშაობა ახლა, როცა საგანგებო მდგომარეობის გამო, მრავალშვილიან ოჯახებს ძალიან გაუჭირდათ, განსაკუთრებულად მნიშვნელოვანია. ქუთაისის მერიის აღნიშნული პროექტი პირდაპირაა მიმართული მათი ეკონომიკური გაძლიერებისთვის და მხარდასაჭერად“- განაცხადა ქუთაისის მერის მოადგილემ ნინო თვალთვაძემ. პროექტისთვის განსაზღვრული თანხა 60 ათასი ლარია

გააზიარე